امي بقلم ا. حسين متولي
....... (امي).......
صحيت م النوم علي حلم الليله دي
كأني طاير في السما والطير ينادي
وصوت امي يصاحيني
الشمس طلعت ياقلبي
وجه ميعاد المدرسه
سنين و صوتها باسمعه
كروان ونازل م السما
وارد ياصباح الهنا
وابوس ايديها الطيبين
مرت سنين واللحن لسه باسمعه
صوتك ياأمي وتسبيحك انا باعشقه
وكبرت واخدت الشهاده
وجريت عليكي افرحك
وبوست رجلك قبل ايدك
والدمعه نازله من عنيكي مزغرطه
وسجدتي سجدة شكر
للي دعاكي استجبله
حافظ لها علي ولدها
ولما جيت م الحرب وعبرت القنال
ونجوم علي اكتافي وحققت المنال
رجعتي تبكي بالدموع جبت انتصار
خدتيني في حضنك كاني
لسه في اللفه صغار
ولما جبتلك الحفيد
قلتي يوميها اليوم دا عيد
ولما جيه يوم الفراق
مسكت ياما سبحتك
ودعيت ياربي اغفر لها
واجعلها قصر يارب ف جنتك
ومسحت دمعي بطرحتك
وحضنت ياما سبحتك
جيلك ياأمي في الميعاد
اللي مااقدر اخلفه
ودي نصيحه مني يابني
امك ثم امك ثم امك
زي ماقال المصطفي.
#حسين_متولي
تعليقات
إرسال تعليق