غيابك كنزعة الروح بقلم زبن سليمان الحصري

 غيابك كنزعه الروح

..... الحنين راجع .....

===============

قالولك أني مش فاكرك وشوفت حياتي ف غيابك

عايش وقلبي ما أتأثرش بغيابك ولا أتهزيت

ولا ببعدك أهتميت ولا عليكى دورت

قلولك أن أنا أتغيرت

و قلبي أتعلم القسوه وهونتي عليا ونسيتك و أنى مش حبيتك 

وأن إللى بينا كان حدوته وخلاص أنفضت

كانت مجرد فتره عشناها وأتقضت

وأن حكايتي معاكي لعب عيال 

دا أى كلام ديما بعد الفراق يتقال

حتى لو أتقال اكتر من كده كلام جارح أنا مسامح

لكن والله أنا لحظه مانسيتك كأني مفارقك أمبارح

ده أنا والله بشوفك

في شكلي لو بصيت فى مرايا

وكأنك سايبه فيا شئ محدش شايفة جوايا

بشوفك ضلي ف الشارع فى العصارى إذا أتمشيت

وبسمع صوتك فى ودانى أذا أتكلمت أو غنيت

وتايه كأنى الطفل إللي في غيابك خرج ومعرفش يرجع تاني البيت

بقيت تايه فى الحياة خلاص تعبت أتهديت

وكأني في دنيا غير الدنيا ومش عارف فين يروح

ومن كل شيئ حواليا بقيت أنا خايف من طلوع الروح

لأول مره أخاف بالشكل ده يعني

وبحس بأن أبسط كلمه بتوجعني

وحسيت بأني مش لاقى مكان ينفع ما شوفكيش فيه

ورقمك حتي مش مسموحلي أرن عليه

بقيت غريب عنك وقلبي حزين 

ومش لاقي حد ورأيا فى دعائى يردد ويقول أمين 

ولا حد يشاركني في المآساه

بقيت راضى ومسلم كل شئ لله 

محوطانى بواقي أيامك 

بتفاصيلك بصورتك وأنتي حضناني

بلمستك الدافية وأنتى بأديكى مسكانى

بضحكه لقيتها على وشك بتزود جوايا أيمانى

حاجات ساذجه حاجات يمكن تكون تافهه ف نظرك ونظر غيري

لكن والله كل تفاصيلها

شاغله تفكيري

مواقف كنا عيشنها وقلوبنا كانت بيضه 

بنضحك والحياة سهله

وكأننا أطفال فى الروضة

حاجات بسيطة حصلت مكنتش مستاهله علشانها نفارق بعض ف الأخر 

بس ساعات بيبقي القدر ساخر

ويسرق كعكه من إيد اليتيم ف العيد

ويقلب فرحته لحزن وتهد حيله م التنهيد

ياريت كانت الدنيا م الأول تلعب معانا على المكشوف

بدال ما نعاني ونهاتي ونخسر بعضنا م الخوف

أنتى بعدتي أه بس عن قلبى لسه مبعدتيش 

وانا بعدت عن الدنيا إللي فيها معاكى بعيش ولسه منستكيش فاكرك رغم الفراق

وهفضل فاكرك وهفضل ليكى مشتاق

وهكلم عنك الاشياء 

وهحكي لكل كائن حي

بإنك حد ملهوش زي

ومهما تغيبي عن قلبى حنينك ليا أكيد راجع 

لأن حنينك فيا لسه عايش حى

==============

..... زين سليمان الحصرى .....