زحمة حنين بقلم مجدي الجندي
زحمة حنين
مجدي الجندي
يا آآآآآآآآآه ومكتومة
بين الصرخة والسكات
وجعك واقف فى حنجرتى
مجمد حواسى ومدركى
بالوقت فات......الوقت فات
والوقت مابيفوتش
الوقت عارف سكته
ودروبه وضحاله
غير بس هو العمر
واخد فى وشه يجر
كراكيب من الايام
شوية كلام م الناس
كإنه ضربة فاس
نازلة فوق هوة دماغ
وقصة حب تتمرجح
ماليها ملامح ولا نهاية
ولا عنوان ولا بداية
يا آآآآه حاجات كتير اتلملمت
واتبعترت وحاولت اجمعها
رجع طنين الوقت فات
مافضلى غير حبة حروف
وقلم مسنود على صوابعى
وورق قديم
ريحته فيها من الحنين
اللى بدور عليه
لكن لإيه... ولا لإيه
العمر بقى........ زحمة حنين
تعليقات
إرسال تعليق